Dikhljaripe e nevipengo ko 17 00h

Tetradji, 23. juli 2014.

NOVI PAZAR - Ambasadori KAR ani Srbia Majkl Kirbi vakargja kaj Khedutne amerikake Raštre paćaena tradicionalno amalipe e Srbiako thaj Rusiako, numa phenibe kaj lumia na ka bahtekerol bidevibe došalipasko vaš uškavibe e teritorialne integtritetsko e Ukrainako. Kirbi ano intervju vaš agencia Beta vakargja kaj pedo thagarutne e Srbiake sito te vakaren so sito interesi e raštrako thaj ano odova fundo te anen pratsava. “Srbia vakargaj kaj paćala teritorialno integriteti e sa phuvjengo dženutne Khedutne naciengo, numa reprezentatoria khonik na vakarde kaj odova sikavela ini Ukraina, sar ini olaki teritoria”, vakargja Kirbi. Ov denga nota kaj butikerdutni klima ani Srbia šukar thaj kaj oj, sar sovela popaše Evropaka uniake, ka ovol poškar vaš amerikake investitoria. «Ulavde amerikake kompanie siton interesuime vaš kinibe smederavaki Železara, a vaš amare investitoria interesantno sito ini Telekom. Adjahar, šanse vaš investiribe si ini ani ruda, ulavde ano pašipe Bor», vakargja ambasadori KAR. Amerikako diplomata vakargja kaj šaj te ovol šukar e Srbia so sig te anavol ambasadori ano Vašington, sar ini kaj semno te alosarolpe čačuno dženo vaš odoja djevaptuni buti. «Džanava kaj minstri avrune bukengo Ivica Dačić, premieri Aleksandar Vučić thaj prezidento Tomislav Nikolić intenzivno gndinena kotar odova kaste te anaven vaš ambasadori ano KAR. Odova but semno pašljoibe, ini kaj ambasadori musaj te ovol dženo savo majšukar ka prezentuinol Srbia ano Vašington thaj ka arakhol olake interesia», vakargja Kirbi. Ambasadori Kirb denga e Betake ano Novi Pazar phenibe kaj šaj te ovol pretenciozno te ovol ola pobaro adžukaribe e neva thagarutnako prekal Sandžak, regioni ano savo minoritetengo them kerela butipe. «Srbia musaj te ovol inkluzivno, musaj te lol ini te ažutinol e minoritetenge themenge. Ano Sandžak phari sitoj ekonomiaki situacia, numa pana pohari ano aver thana e Srbiake. Resia akala thagarutnake siton dženutnipe ani EU, keribe formengo vaš thagaripe e hakajengo, paćavibe manušikane hakaja thaj putaribe neve butikerdutne thana. odola siton bukja ano save siolen amaro ažutipe thaj gndinava kaj olenge realizuiba ka ovol kerdo anglaliipe ano Sandžak, sar ini ano aver thana e Srbiake», vakarga Kirbi.

BEOGRAD – Ministri avrune bukengo Srbiiako Ivica Dačić vakargja avdive kaj Srbia majzorale dela davie kotar peravibe malezisko aeroplani ani Ukraina. “Da apeli kaj so sig manglape te ovol maksimalno buti thaj kobor šaj amen te ažutina. Roda apsolutno biphanglo rodipe kotar peribe e aeroplanesko”, vakargja Dačić e žurnalistenge ani Avala. Ministri vakargja kaj Srbia ka kerol piri avruni politika e EU. “Vaš amen odova sito bitrumimo thaj amen ka ova jekh e phuvjenca EU, numa ni sa dženutne EU nanolen pedo sa teme jekha jekh bahamia. Amen ka dikha te ova balansirima politika, a sajekh ka oven presie kotar but thana”, vakargja Dačić.

BEOGRAD – Srbia ani majšukar situacia vaš deš berša šaj te inarol publikako udžuklipe ano 45 šelestar bruto kherutne produktengo, so sito maksimum savo ando kanunea, vakargja dženoi Fiskalne konsilesko Vladimir Vukčević. Ano seminari vaš senatoria ano Parlamenti Srbiako kotar budžeti thaj budžetesko procesia Vučković vakargja kaj ini disave projekcia save kergja Fiskalno konsili, sar ini Thagarutni ani paluni fiskalno strategia, sikavela kaj Srbia našti sig thaj loke te inarolpe ano rami adikarde dromesko vaš publikako udžulipe. Prekal lafja e Vučkovićeske, Srbia siola but pobaro deficiti e budžetesko sajekh raštrako ze so ando Kanunea kotar budžetesko sistemi, savo dikhljarela jekh šelestar. “Ka dikha savo ka ovol rebalansi thaj napja, numa akanutno logari sikavela kaj deficiti sito ohto šelestar BKP. Adjahar kaj siam dur e resosta, a pana pobaro bilačhipe so kotar berš ano berš ano than te ovol amen tiknjardo deficiti thaj te pašova resoske, amen nakha ani diferento rig”, vakargja dženo Fiskalne konsilesko.

BEOGRAD – Nacioanlno servisi vaš bućarnipe ani evidencia siole 77.000 bibućarne thaj odova gendo sajekh perela, vakargja avdive direktori odole servisesko Zoran Martinović. “Majbut bibućarne terne si tha pophure e 50 beršenda”, vakargja Martinović vaš Radio televizia Srbia. Ani Srbia gendo e bibućarnipasko sito maškar 20 thaj 21 šelestar so ini stagnirinela e oktobaresta ko nakhlo berš, vakargja Martinović. Ov vakargja kaj badžako e bibućarnipasko ani Srbia sito duj droma pobaro ze ano phuva Evropaka uniake, numa denga nota kaj Srbia sitoj “ano šukar drom te marolpe odolea”.

NOVI SAD - Projekati "Inkluzia e romane sikljovnengi ano maskarutne skole ani Vojvodina”, kaske rezultatia prezentuime ani Krainaki thagarutni, arakhlja stipendie vaš pobut e 1.600 sikljovne romane nacionalnosti thaj tiknjargja olengo ačhibe e skoluibasta e 20 pedo 3,5 šelestar ano beršesko niveli. Projekti sine efta berša, a love vaš realizacia sine paše 220 milionia dinarja. Ano projekti lele kotor pobut e 860 sikljovne thaj 110 mentoria kotar 90 rndono maskarutne skole ani Vojvodina. Direktori projektesko Dragana Dimitrov vakargja kaj pali implementacia gendo e stipendistengo save hraminde fakultetia sito duj droma pobaro, thaj kaj dikhisalo gendo e sikljovnengo ano sa nivelia e edukuibaske, e angloskolake institucienda dži fakultetia. “Momentalno gendo e sikljovnengo savo palo akava projekti hraminde fakulteti nane amen, odova kerela Kancelaria vaš inkluzia e Romengi, numa džana kaj gendo amare stipendistjengo save hraminde fakultetia sito duj droma pobaro”, vakargja Dimitrov. Prekal olake lafja, stipendie e sikljovnenge dende ano trinmasekekse nivelesko, prekal kriterijumia e suksesesko ano edukuibe, jase dikhljardo o sikljovne te ovol olen šukar suksesi bi ačhiba e skoluibasta. “Te sine kaj sikljovno na phergja kriterijumia, stipendie nane pokime, već ačhavde dži momenti kana o sikljovno lačharela poro suksesi”, vakargja oj. Sar vakargja, ano anglalipe e skolake beršesko sikljovnenge pokimo po 6.000 dinarja vaš skolako materiali, a jekh e resjenda sine prekal kontakti e sikljovnenca thaj šukar misalenca te bajarolpe “edukuibe”. Projekti “Inkluzia e romane sikljovnengi ano maskarutne skole ani AK Vojvodina” finansirime Fondi vaš edukuibe e Romengo, Fondacia vaš putardo amalipe thaj Krainako sekretariati. Kotar fondi vaš edukuibe e Romengo mothavena kaj ka ovol nevo projekti “Akate siam- Evropako ažutipe vaš inkluzia e Romengi”, prekal savo ano avutno skolako berš stipendie ka len 1.000 romane maskarutne skolake sikljovne ani sa Srbia. konkursi vaš stipendistia ano akava projekti ka ovol putardo e 15. avgustesta dži 15. septembri.

Beta pobut →


2014.07.23
Dikhljaripe e nevipengo ko 12 00h

2014.07.22
Dikhljaripe e nevipengo ko 17 00h

2014.07.22
Dikhljaripe e nevipengo ko 12 00h

2014.07.21
Dikhljaripe e nevipengo ko 17 00h

2014.07.21
Dikhljaripe e nevipengo ko 12 00h